काठमाडौँ : जनमत पार्टीका अध्यक्ष डा. चन्द्रकान्त (सिके) राउतले देशमा दुई दलीय व्यवस्था लाद्ने षड्यन्त्र भइरहेको बताएका छन्।

बिहीवार काठमाडौँमा गजेन्द्रनारायण सिंहको २४ औँ पुण्यतिथिको अवसरमा आयोजित कार्यक्रमपछि सञ्चारकर्मीसँग कुरा गर्दै उनले यस्तो बताएका हुन्। उनले सरकारका पछिल्ला केही निर्णयले दुई दलीय व्यवस्था लाद्ने षड्यन्त्र भइरहेको महसुस गरेको बताए।

उनले मधेशवादी दलहरू अब एकत्रित हुने ठूलो सम्भावना रहेको पनि बताए। उनले दुईवटा विपरीत धारका दलहरू मिलेर सरकार बनाउने कुरा लोकतान्त्रिक देशमा बिरलै हुने बताए।

राउतले भने, ‘मधेशवादी दलहरू एकत्रित हुने ठूलो सम्भावना छ। दुईवटा ठूला दल मिलेर सरकार बनाएका छन्। दुई विपरीत धारका दलहरू मिलेर सरकार बनाउने कुरा लोकतान्त्रिक देशमा हुँदैन। जुन किसिमका ऐनहरू अहिले संशोधन गर्न लागेका छन्, यसले के स्पष्ट हुन्छ भने यहाँ दुई दलीय व्यवस्था लाद्ने षड्यन्त्र हुँदै छ। मधेश केन्द्रित दलहरू मात्रै होइन, ती दुई दलहरू बाहेक अरू सबै दलहरू मिलेर सडकमा आउने सम्भावना प्रबल देखेको छु।’

अध्यक्ष राउतले व्यवस्थामाथि नै खतरा आउने चिन्ता लागेको बताए।